A të është bërë padrejtësi? Fal!
13. mars e premte
“Duke duruar njëri-tjetrin dhe duke falur njëri-tjetrin” Kolosianëve 3:13
Kur studion jetën e atyre që u përdorën shumë nga Perëndia në Bibël, sheh se ata nuk u kursyen nga lëndimi, zhgënjimi apo edhe tradhtia. E vërteta është, se nëse jeton mjaftueshëm, dikush do të bëjë padrejtësi ndaj teje. Pyetja është, si do të reagosh? Apostulli Pal na tregon se si duhet të reagojmë: “Duke duruar njëri-tjerin dhe duke falur njëri-tjetrin, nëqoftëse dikush ankohet kundër një tjetri; dhe sikundër Krishti ju ka falur, ashtu edhe ju”.
Tregohet historia e dy miqve që po ecnin nëpër shkretëtirë kur u grindën. Njëri mik e qëlloi tjetrin në fytyrë. Ai që u qëllua u lëndua. Por pa thënë asgjë, ai shkroi në rërë: “Sot shoku im më i mirë më qëlloi në fytyrë”. Ata vazhduan të ecnin derisa gjetën një oaz. Meqenëse ishin të etur, ndaluan për ujë. Ai që ishte qëlluar ngeci në baltë, ra në të dhe filloi të mbytej. Shoku i tij pastaj shtriu dorën dhe e shpëtoi. Atë natë, ai gdhendi këtë në një gur: “Sot shoku im më i mirë më shpëtoi jetën”. Shoku që e kishte qëlluar fillimisht dhe pastaj e kishte shpëtuar pyeti: “Pasi të lëndova, ti shkrove në rërë. Dhe tani shkruan në një gur. Pse?”. Ai u përgjigj: “Kur dikush na lëndon, duhet ta shkruajmë në rërë, ku erërat e faljes mund të fryjnë dhe ta fshijnë. Por kur dikush bën diçka të mirë për ne, duhet ta gdhendim në gur ku do të mbahet mend gjatë”. Mëshira harron gabimet dhe kujton të drejtat!
