Le t’i themi gjithë botës për Jezusin
14. gusht e premte
“Unë u përgjigja: ‘Ja ku jam, dërgomë mua!’” Isaia 6:8
Një nga fatkeqësitë më të mëdha të historisë ndodhi në vitin 1271. Atë vit, Nikolo dhe Mateo Polo, babai dhe xhaxhai i Marko Polos, vizituan Kublai Hanin, i cili konsiderohej sundimtari i botës — me autoritet mbi gjithë Kinën, Indinë dhe të gjithë Lindjen. Kublai Hani u tërhoq nga historia e Krishtërimit, ashtu siç ia treguan Nikolo dhe Mateo. Ai u tha atyre: “Ju do të shkoni te kryeprifti juaj dhe do t’i thoni, në emrin tim, të më dërgojë njëqind burra të aftë në fenë tuaj dhe unë do të pagëzohem. Dhe kur të pagëzohem unë, të gjithë baronët dhe njerëzit e mëdhenj të mi do të pagëzohen dhe, edhe populli i tyre do të marrë pagëzim. Dhe kështu, këtu do të ketë më shumë të krishterë sesa ka në vendet tuaja.” Por, çuditërisht, asgjë nuk u bë në përgjigje të asaj që kërkoi Kublai Hani. Vetëm pas tridhjetë vjetësh u dërgua një numër i vogël misionarësh. Tepër pak, tepër vonë! Udhëheqësit e krishterë në Perëndim duket se nuk kishin vizionin për ta parë Lindjen të fituar për Krishtin. Habitesh kur mendon për mënyrat e mundshme se si bota sot mund të ishte ndryshe, nëse Kina, India e shekullit të trembëdhjetë dhe rajonet e tjera të Azisë do të ishin bërë të krishtera.
Tani radha është e jona! Ti thua: “Çfarë mund të bëj unë? Jam vetëm një person.” Ti mund të bësh tri gjëra: (1) “Lutjuni Zotit të të korrave që të dërgojë punëtorë në të korrat e Tij” (Mateu 9:38). (2) Jepni, që ata që nuk janë të shpëtuar të mund të arrihen me Ungjillin (shih 2 Korintasve 9:7). (3) Nëse Perëndia të thërret, shko! “Unë u përgjigja: ‘Ja ku jam, dërgomë mua!’”.
