“Munde të keqen me të mirën”
11. gusht e martë
“Mos u mund nga e keqja, por munde të keqen me të mirën.” Romakëve 12:21
Gjatë Luftës së Koresë, një civil koreano-jugor u arrestua nga komunistët dhe u urdhërua të pushkatohej. Kur udhëheqësi i ri komunist mori vesh se i burgosuri që kishte nën përgjegjësi ishte drejtuesi i një jetimoreje që kujdesej për fëmijë të vegjël, ai vendosi ta falte. Në vend të kësaj, ai urdhëroi ekzekutimin e djalit të burrit. Djali nëntëmbëdhjetëvjeçar u qëllua për vdekje në praninë e të atit. Pas luftës, udhëheqësi i ri komunist u kap nga forcat e Kombeve të Bashkuara dhe u dënua me vdekje. Por përpara se dënimi të zbatohej, i krishteri, djalin e të cilit e kishin vrarë, u lut për jetën e vrasësit. Ai argumentoi se komunisti kishte qenë i ri kur kishte urdhëruar ekzekutimin dhe se në të vërtetë nuk e dinte çfarë po bënte. “Ma jepni mua,” kërkoi ai, “dhe unë do ta trajnoj.” Sado e pazakontë të dukej, forcat e Kombeve të Bashkuara e pranuan kërkesën e tij dhe babai e mori në shtëpinë e vet vrasësin e djalit të tij dhe u kujdes për të. Bibla thotë: “Dashuria nuk dështon kurrë” (1 Korintasve 13:8). Dhe duke u ekspozuar ndaj dashurisë së Perëndisë, ai udhëheqës i ri komunist u bë i krishterë dhe me kalimin e kohës, u bë pastor i një kishe.
A je lënduar, tradhtuar ose trajtuar padrejtësisht? Në vend që të hakmerresh me zemërim, trajtoje këtë sipas Shkrimit: “Mos ia ktheni kurrkujt të keqen me të keqe … Mos u hakmerrni për veten tuaj, o të dashur, por i jepni vend zemërimit të Perëndisë, sepse është shkruar: "Mua më përket hakmarrja, unë kam për të shpaguar, thotë Zoti". Mos u mund nga e keqja, por munde të keqen me të mirën.” (Romakëve 12:17, 19, 21).
