Perëndia po punon në të mirën tënde
28. shtator e hënë
“Dhe ne e dimë se të gjitha gjërat bashkëveprojnë për të mirë për ata që e duan Perëndinë” Romakëve 8:28
Bibla fillon me këto fjalë: “Në fillim Perëndia krijoi qiejt dhe tokën. Toka ishte pa trajtë, e zbrazët dhe errësira mbulonte sipërfaqen e humnerës; dhe Fryma e Perëndisë fluturonte mbi sipërfaqen e ujërave. Pastaj Perëndia tha: "U bëftë drita!". Dhe drita u bë. Dhe Perëndia pa që drita ishte e mirë” (Genesis 1:1-4).
Edhe kur jeta jote duket një kaos i shpërndarë, ti mund të besosh te Perëndia që solli rend nga kaosi dhe dritë nga errësira, që të të ndihmojë që jeta jote të ketë kuptim. Kur beson se “të gjitha gjërat bashkëveprojnë për të mirë” (Romakëve 8:28), kjo rishikon gjërat e këqija që ndodhin. Dita më e keqe e jetës tënde mund të kthehet në ditën më të mirë. Ka një anë të mirë në çdo re dhe çdo ecuri negative ka një potencial pozitiv. Kur e interpreton jetën përmes këtij prizmi, kjo të jep besim se gjithçka do të shkojë mirë. Të qetëson duke të kujtuar se më e mira ende vjen, sepse Perëndia tha: “‘Sepse unë i njoh mendimet që kam për ju’, thotë Zoti, ‘mendime paqeje dhe jo të së keqes’” (shiko Jeremia 29:11).
Por ndonjëherë ti ke një rol për të luajtur. Perëndia po vendos takime hyjnore, por ti duhet t’i përmbushësh. Perëndia është dhurues, por ti duhet ta ndezësh dhuratën tënde në flakë. Perëndia po thërret, por ti duhet të përgjigjesh (shiko Isaia 6:8). Perëndia po i udhëheq hapat e tu, por ti duhet të ecësh në përputhje me Frymën. Nëse besnikërisht bën pjesën tënde, mund të jesh i sigurt se Perëndia do të bëjë pjesën e Tij — që është të punojë për të mirën tënde.
