Bëhu gati për ndryshim (1)
25. shtator e premte
“Ndonëse gjendja jote e kaluar ka qenë një gjë e vogël, e ardhmja jote do të jetë e madhe” Jobi 8:7-8
Ne shpesh imbajmë fort njerëzit dhe gjërat sikur të mund të mbajmë gjithçka të pandryshuar, por kjo nuk mund të bëhet. Ajo që mund të bësh është të jesh gati për të përballuar ndryshimin kur ai ndodh. Ti mund të mos jesh në gjendje të parashikosh se cili do të jetë ndryshimi, por mund të vendosësh gjëra që të ndihmojnë ta përballosh atë kur të vijë. Fëmijët shkojnë në universitet, prandaj prindërit e mençur mendojnë për të kursyer që nga momenti kur lindin foshnjat. Njerëzit një ditë e ndërpresin punën, prandaj ka kuptim të kursesh për pension. Një CEO që një ditë do të largohet planifikon një pasardhës, në mënyrë që kompania të vazhdojë të lulëzojë.
Ndonjëherë ndryshimi është i vështirë, por planifikimi na ndihmon ta përballojmë atë. Me Perëndinë pranë teje, ke të gjitha mjetet që të duhen për sukses, duke përfshirë fleksibilitetin dhe aftësinë për t’u përshtatur dhe ndryshuar drejtimin kur është e nevojshme. Mendo se si teknologjia, si telefonat celularë dhe kompjuterat kanë ndryshuar mënyrën se si komunikojmë, bëjmë blerje dhe jetojmë. GPS-i është një inovacion i mrekullueshëm teknologjik, por fillimisht drejtuesit nuk ishin shumë të lumtur ta përdornin. Por ai ka transformuar përvojën e gjetjes së rrugës gjatë drejtimit të mjetit. Ndërsa përballesh me ndryshimet e jetës: (1) Kupto se Perëndia jeton brenda teje, vepron përmes teje dhe gjithmonë ka interesin tënd më të mirë në zemër (shiko Filipianëve 2:13). (2) Përdor mjetet dhe teknikat më të fundit, qoftë teknologjike, qoftë në qasje të reja ndaj jetës familjare, dietës, ushtrimeve ose frymëzimit. Me fjalë të tjera, përgatitu për ndryshim.
