Perëndia mund të të shërojë (2)
3. tetor e shtunë
“Ai fal të gjitha paudhësitë e tua dhe shëron të gjitha sëmundjet e tua” Psalmi 103:3
Psalmisti shkroi: “Beko, shpirti im, Zotin dhe mos harro asnjë nga të mirat që ka bërë. Ai fal të gjitha paudhësitë e tua dhe shëron të gjitha sëmundjet e tua, shpengon jetën tënde nga shkatërrimi dhe të kurorëzon me mirësi dhe dhembshuri” (v. 2-4). Davidi ia kujtoi vetes këto katër gjëra ndaj duhet t’i kujtosh edhe ti. Perëndia i kishte falur të gjitha mëkatet e tij. Perëndia i kishte shëruar të gjitha sëmundjet e tij. Perëndia e kishte shpenguar jetën e tij nga vdekja dhe shkatërrimi. Perëndia e kishte kurorëzuar me dashuri, mirësi, mëshirë dhe hir.
Bibla shkruan: “Dhe iu afruan turma të mëdha që sillnin me vete të çalë, të verbër, memecë, sakatë dhe shumë të tjerë; i ulën përpara këmbëve të Jezusit dhe ai i shëroi” (Mateu 15:30). A ishin këta të krishterë të rilindur që Jezusi i shëroi? Jo, kjo ndodhi përpara kryqit. Mendo për këtë: nëse Jezusi ishte i gatshëm t’i shëronte të gjithë ata, atëherë, si një fëmijë i shpenguar i Perëndisë që ke vënë besimin tënd në Krishtin për shpëtim, Ai mund të të shërojë edhe ty. A je besimtar? Po? Atëherë lexo këtë Shkrim dhe qëndro mbi të: “Dhe këto janë shenjat që do t'i përcjellin ata që do të besojnë … do t'i vënë duart mbi të sëmurët dhe këta do të shërohen” (Marku 16:17–18). Jakobi shkroi: “A është i sëmurë ndonjë nga ju? Le të thërrasë pleqtë e kishës dhe ata të luten përmbi të, dhe le ta lyejnë me vaj në emër të Zotit, dhe lutja e besimit do ta shpëtojë të sëmurin dhe Zoti do ta mëkëmbë” (Jakobi 5:14–15). Nëse je i sëmurë, qëndro mbi Fjalën e Perëndisë dhe beso se Ai do të të shërojë.
