Kujdesu mirë për nënën tënde!
15. mars e diel
“Secili prej jush të respektojë nënën…Unë jam Zoti Perëndia juaj” Levitiku 19:3
Kur prindërit e tu plaken dhe bëhen më pak të aftë që të kujdesen për veten, ata kanë nevojë për disa gjëra nga ti, si dashuria, mirësia, durimi, butësia, ndjeshmëria dhe mirëkuptimi. Kur ishe fëmijë, ndoshta nëna jote të merrte në shkollë, sepse nuk të pëlqente të hipje në autobus dhe tani je i mërzitur me të se u vonua pesë minuta. Nëse je adoleshent ose para-adoleshent, është gabim të jesh më i sjellshëm, më i kujdesshëm dhe më i durueshëm me miqtë e tu dhe me nënat e miqve të tu sesa me nënën tënde. Në të vërtetë, nëse do t'i trajtosh miqtë e tu siç trajton mamanë tënde, ty s’do të të mbesnin shumë miq. Dhe nëse do ta trajtoje nënën e tyre siç bën me tënden, nëna e tyre nuk do ta linte fëmijën e saj të kishte të bënte me ty.
Kur nëna jote plaket dhe ka nevojë për më shumë kujdes, është koha t’ia kthesh mbrapsht kujdesin! “Por ajo gjithmonë ankohet”, thua ti. Po, ashtu siç ke bërë edhe ti apo jo? “Por ajo flet për veten dhe bën të njëjtat pyetje vazhdimisht”. Ndërsa plaken, prindërit tanë përjetojnë frikëra që nuk i kanë pasur kurrë më parë dhe kanë nevojë që ti t'i sigurosh se do të jesh gjithmonë aty për ta. Një nga gjërat e fundit që bëri Jezusi kur po vdiste në kryq ishte t'ia besonte kujdesin e nënës së Tij, Marisë, mikut të Tij të ngushtë dhe dishepullit, Gjonit: “Pastaj i tha dishepullit: ‘Ja nëna jote!’. Dhe që në atë moment ai e mori në shtëpinë e vet” (Gjoni 19:27). Prandaj, fjala për ty sot është – kujdesu mirë për nënën tënde!
