Ndershmëria është më e mira
18. janar e diel
“Ai që ecën në ndershmëri ecën i sigurt, por ai që ndjek rrugë dredharake ka për t'u zbuluar” Fjalët e Urta 10:9
Në përgatitje të një darke, një grua ndaloi në një thertore për të blerë mish për vaktin. Ajo kishte vendosur të bënte pulë të mbushur dhe të pjekur si pjatë kryesore. Kur i kërkoi kasapit për pulën më të madhe që kishte, ai shkoi tek frigoriferi, mori pulën e fundit që kishte dhe e vendosi tek peshorja. “Kjo peshon dy kile zonjë”, tha ai. Gruaja mendoi për një moment dhe më pas tha: “Nuk mendoj se kjo do më mjaftojë. A nuk ke ndonjë më të madhe?”. Kasapi e vendosi sërish pulën në frigorifer, bëri sikur po kërkonte për një pulë tjetër dhe më pas nxorri prapë të njëjtën pulë. Kësaj rradhe kur e peshoi, ai ushtroi pak presion me gisht në peshore. “Ah”, buzëqeshi ai, “Kjo peshoka tre kile”. Gruaja rrudhi vetullat dhe duke bërë disa llogaritje me mend, buzëqeshi ndërsa tha: “Thjesht nuk jam e sigurt. Dëgjo këtu – mi jep të dyja!”.
Nuk ka dyshim që “ndershmëria është më e mira”. Dhe kështu është në këtë jetë dhe në jetën që do të vijë. Sa për këtë jetë, Bibla thotë: “Ai që ecën në ndershmëri ecën i sigurt, por ai që ndjek rrugë dredharake ka për t’u zbuluar”. Dhe këtë thotë Bibla për jetën që do të vijë: “Prandaj mos gjykoni asgjë para kohe derisa të vijë Zoti, që do të nxjerrë në dritë gjërat e fshehta të errësirës dhe do të shfaqë këshillat e zemrave; dhe atëherë secili do të ketë lavdërimin e vet nga Perëndia” (1 Korintasve 4:5).
