Pranoje që Fryma e Perëndisë banon brenda teje
19. shkurt e enjte
“Trupi juaj është tempulli i Frymës së Shenjtë që është në ju” 1 Korintasve 6:19
Lëre mënjanë pyetjen se deri në çfarë mase je i aftë të përjetosh praninë e Perëndisë në gjendjen tënde aktuale shpirtërore. Lëri mënjanë dështimet e kaluara dhe shqetësimet e së ardhmes. Nëse je një fëmijë i shpenguar i Perëndisë, Fryma e Tij e Shenjtë jeton brenda teje. Jezusi tha: “‘Ai që beson në mua…nga brendësia e tij do të burojnë lumenj uji të gjallë’. Por këtë ai e tha për Frymën, që do të merrnin ata që do të besonin në të; sepse Fryma e Shenjtë në fakt nuk ishte dhënë ende, sepse Jezusi ende nuk ishte përlëvduar” (Gjoni 7:38-39).
Fryma e Shenjtë është brenda teje gjatë gjithë kohës, duke vërshuar brenda teje, duke shuar dëshirat e tua të paplotësuara dhe duke u derdhur për të freskuar ata përreth teje. Qëllimi dhe dëshira e Tij është të punojë përmes teje gjatë gjithë kohës, në çdo vend. Mos harro se Perëndia, Jezusi dhe Fryma e Shenjtë janë një. Pra, kur flasim për Perëndinë që punon në jetën tënde, për Jezusin që është në zemrën tënde ose kur flasim që trupi yt është tempulli i Frymës së Shenjtë, është e njëjta gjë.
Autori John Ortberg tregon për një mik, vajza pesë vjeçare e të cilit tha: “E di që Jezusi jeton në zemrën time, sepse kur e vë dorën time mbi të, mund ta ndiej Atë duke ecur aty”. Disa njerëz duket se kanë këtë lloj radari të brendshëm për të zbuluar praninë e Perëndisë. Ashtu si disa muzikantë kanë ton të përsosur, ata kanë një vesh për të dalluar zërin e Perëndisë. T’u thuash atyre se si të kërkojnë Perëndinë do të ishte si t'i thuash një peshku se si të kërkojë ujë - ku tjetër do të jetonin? Në fund të fundit - ashtu si prania e Perëndisë jeton në ty, ti mund të jetosh me vetëdije në praninë e Perëndisë çdo moment.
