Vetëmohimi; sekreti i një martese të lumtur
14. janar e mërkurë
“Dashuria është e durueshme; plot mirësi…nuk kërkon të sajat” 1 Korintasve 13:4-5
Le të fillojmë me tre histori të shkurtra të cilat shpjegojnë sfidën e ndërtimit të një martese të fortë dhe të lumtur. Historia e parë: “Një burrë po vëzhgonte një çift dhe i tha gruas së tij: ‘Shikoji ata, duken kaq të lumtur’. Ajo tha: ‘Mos ji kaq i sigurt, me shumë mundësi po thonë të njëjtën gjë për ne’. Historia e dytë: “Një grua një herë ka thënë: ‘Unë dhe burri im kemi një martesë shumë të lumtur. Nuk ka asgjë që unë nuk do ta bëja për atë dhe nuk ka asgjë që ai nuk do bënte për mua. Kështu që e kemi kaluar jetën duke mos bërë asgjë për njëri-tjetrin’. Historia e tretë: “Një burrë i tha shokut të tij: ‘Unë dhe gruaja ime kemi vendosur që kurrë mos të shtrihemi në krevat të inatosur’. Shoku e pyeti: ‘Si po ju shkon?’. Ai iu përgjigj: ‘Kemi një muaj që nuk flemë’”.
Seriozisht, sfida më e madhe në martesë është egoizmi. Kur dy njerëz vënë interesat dhe dëshirat e tyre të parat, marrëdhënia e tyre shkon drejt problemeve dhe me shumë mundësi drejt gjykatës së divorcit. Cila është përgjigja? Këto fjalë të frymëzuara u shkruan gati dy mijë vite më parë, por janë akoma formula e Perëndisë për një martesë të suksesshme: “Dashuria është e durueshme; plot mirësi; dashuria nuk ka smirë, nuk vë në dukje, nuk krekoset, nuk sillet në mënyrë të pahijshme, nuk kërkon të sajat, nuk pezmatohet, nuk dyshon për keq; nuk gëzohet për padrejtësinë, por gëzohet me të vërtetën, i duron të gjitha, i beson të gjitha, i shpreson të gjitha, i mban çdo gjë. Dashuria nuk ligështohet kurrë…Tani, pra, këto tri gjëra mbeten: besimi, shpresa dhe dashuria; por më e madhja nga këto është dashuria” (vargjet 4-8, 13).
