Shpërblimi yt është në qiell
20. janar e martë
“Gëzohuni dhe ngazëllohuni, sepse shpërblimi juaj është i madh në qiej” Mateu 5:12
Historiani Edward Gibbon studioi përparimin e shpejtë të Krishtërimit në ditët e Perandorisë Romake dhe tregon pesë arsye për këtë: (1) Zelli i të krishterëve të parë. (2) Fuqia e mrekullive. (3) Moral i pastër i të krishterëve. (4) Organizimi i ngjeshur i kishës. (5) Besimi në shpërblimet e ardhshme. Bibla shpesh flet për shpërblimet tona në qiell. Ja disa shembuj: “Lum ju kur do t’ju shajnë dhe do t’ju përndjekin dhe duke gënjyer do të thonë të gjitha të zezat kundër jush, për shkakun tim. Gëzohuni dhe ngazëllohuni, sepse shpërblimi juaj është i madh në qiej” (vargjet 11-12). “Sepse Biri i njeriut do të vijë në lavdinë e Atit të vet bashkë me engjëjt e tij; dhe atëherë ai do të shpërblejë secilin sipas veprës së tij” (Mateu 16:27). “Në fakt, kushdo që do t’ju japë të pini një gotë ujë në emrin tim, sepse jeni të Krishtit, në të vërtetë po ju them se me siguri nuk do ta humbasë shpërblimin e vet'' (Marku 9:41). “Askush të mos përvetësojë prej jush çmimin me pretekst përulësie dhe kulti të engjëjve” (Kolosianëve 2:18). “Dhe ja, unë vij shpejt, dhe shpërblimi im është me mua, për t'i dhënë gjithsecilit sipas veprave që ai ka bërë” (Zbulesa 22:12 NKJV).
Ja rendi i ngjarjeve: Zoti do të vijë nga qielli, të vdekurit në Krishtin do të ringjallen, të shpëtuarit që janë akoma gjallë do të bashkohen me ta dhe ne do të marrim trupat tanë qiellorë dhe më pas shpërblimet tona qiellore. “Zjarri do të provojë veprën e secilit e ç’lloji është. Në qoftë se vepra që dikush ka ndërtuar mbi themelin qëndron, ai do të marrë një shpërblim” (1 Korintasve 3:13-14). “Prandaj, o vëllezërit e mi të dashur, qëndroni të fortë e të patundur, duke tepruar përherë në veprën e Zotit, duke e ditur se mundi juaj nuk është i kotë në Zotin” (1 Korintasve 15:58).
