Rrezik i dyfishtë
18. prill e premte
“Të shfajësuar, pra, me anë të besimit, kemi paqe me Perëndinë nëpërmjet Jezu Krishtit, Zotit tonë” Romakëve 5:1
Në sistemin ligjor, ka diçka që njihet si “ligji i rrezikut të dyfishtë”. Do të thotë që nuk mund të hidhesh në gjyq dy herë për të njëjtin krim. Tani, le ta aplikojmë këtë parim tek shpëtimi yt. Jezusi është gjykuar dhe ndëshkuar për mëkatet e tua – për të gjitha! Ndaj mos e lër Satanin, akuzuesin, të të bindë se Perëndia do të të ndëshkojë për ato dhe se do të të dërgojë në ferr. Fjalët e fundit të Krishtit në kryq, “U krye”, përkthehen në greqisht si “u pagua plotësisht”. Të gjitha mëkatet e tua – të kaluara, të tashme dhe të ardhme – u paguan në Kalvar.
Mendo për fjalën “përfundim”. Imagjino një zdrukthtar mjeshtër duke bërë detajet e fundit në një tavolinë të bukur. A do merrje një zdrukth druri dhe të thoshe: “Mendoj se mund ta bëj të duket pak më mirë dhe t’i jap pak më shumë vlerë?”. Zdrukthtari do të thoshte: “Ndalo; nëse e prek, do ta prishësh!”. Dhe do të kishte të drejtë. E njëjta gjë edhe për shpëtimin tënd. Nuk mund t’i shtosh gjë, por duke u përpjekur ta meritosh me anë të sjelljes dhe veprave të mira, me siguri do të heqësh diçka prej tij.
Fjala “i shfajësuar” do të thotë i deklaruar ose i bërë i drejtë në sytë e Perëndisë. Në momentin që beson tek Krishti si Shpëtimtari yt, ashtu të sheh Perëndia. “Të shfajësuar, pra, me anë të besimit, kemi paqe me Perëndinë nëpërmjet Jezu Krishtit, Zotit tonë, me anë të të cilit edhe patëm, nëpërmjet besimit, hyrjen në këtë hir në të cilin qëndrojmë të patundur dhe mburremi në shpresën e lavdisë së Perëndisë” (vargjet 1-2). Si mund të qëndrosh para Perëndisë i mbuluar me hir? Me anë të besimit vetëm te Krishti dhe tek asgjë tjetër.
