Inkurajo dikë sot
28. tetor e martë
“Forconi duart e dobësuara, bëjini të qëndrueshëm gjunjët e pasigurt! U thoni atyre që e kanë humbur zemrën: ‘Bëhuni të fortë, mos kini frikë!’” Isaia 35:3-4
Secili prej nesh ka nevojë për inkurajim (mbështetje që frymëzon vetëbesim dhe një vullnet për të vazhduar). Fjalët që ne flasim mund të ndërtojnë ose mund të shkatërrojnë njerëzit rreth nesh. Autorja Rebecca Barlow Jordan shkruan: “Një nga pyetjet e para që më pëlqen t’i bëj Jezusit kur zgjohem çdo mëngjes është: ‘Si mund të inkurajoj dikë sot? Dhe kë?’. Ai është gjithmonë besnik në të përgjigjur, shpesh përmes Fjalës së Tij. Një mëngjes pasi bëra këtë pyetje, lexova Isaian 35:3-4 dhe gjeta një përgjigje praktike. Së pari, “forconi duart e dobësuara”. Kjo mund të përfshijë mësuesit, parukieret, mamatë, shkrimtarët…misionarët, pastorët dhe prindërit…Më pas, pasazhi përmend inkurajimin e atyre që kanë ‘gjunjë të pasigurt’. Përfytyrova gjyshërit dhe të moshuarit, veteranët e madje dhe atletët me trupa të konsumuar. Por kategoria e fundit, “ata që kanë humbur zemrën”, mund t’i përfshijë të gjithë. Ata të cilët duhet të dëgjojnë fjalët: “Bëhuni të fortë dhe mos kini frikë”…
Për mua, gjetja e njerëzve për të inkurajuar nuk është e vështirë. Por më duhet të përmirësohem me dëgjimin dhe ndjekjen e përgjigjes së Jezusit. Gjëja e mrekullueshme është se, kur përpiqem të inkurajoj dikë, unë dal e inkurajuar. Kërkoji Jezusit të të ndihmojë të inkurajosh dikë sot. Ftoje atë të flasë përmes teje dhe përgatitu për përgjigjet e Tij”. Pali ka thënë: “Prandaj, sa të kemi rast, le t'u bëjmë të mirën të gjithëve, por në radhë të parë atyre që janë në familjen e besimit” (Galatasve 6:10). Ndërsa e mbush mendjen duke menduar për mënyra se si të forcosh besimin tek të tjerët, do të mahnitesh se sa do të energjizohesh dhe bekohesh gjatë procesit.
